ازاي تبطل تدخين نهائيا ومترجعش تدخن تانى

إنك تبطل تدخين دا إنجاز كبير المفروض تفرح به ودي أحسن حاجة تعملها عشان صحتك وصحة الناس حواليك وأهلك وأحبابك

التدخين نوع من أنواع الإدمان (إدمان النيكوتين) وعشان تبطل محتاج عزيمة قوية ودعم نفسي قوي جدا من الأهل والأصحاب عشان تضمن ان محاولتك تنجح 100% ومترجعش تدخن تاني لازم نعالج حاجتين: جانب نفسي (عزيمة وتشجيع الأهل والأصحاب) وجانب عضوي (بالأدوية)

أول ايام بعد توقف عن التدخين تعتبر هي أصعب أيام وممكن تجيلك أعراض وحشة ولازم تكون متوقعها وتاخد الأدوية عشان مترجعش 

ال craving هي الرغبة الشديدة في التدخين بعد ما تبطل والرغبة دي بتجيبك لما تكون مضغوط نفسيا او لما تشوف ناس تانية بتدخن .. بنعالج الرغبة دي بالأدوية وكمان انك تشغل نفسك بالمشي والجري والرياضة وتغيير الجو وتبعد عن الناس دي (65%؜ من الناس اللي رجعت تدخن تاني كان بسبب انهم قعدوا مع ناس لسه بتدخن) حط لنفسك تاريخ تبطل فيه والتزم به ولما تبطل توقف نهائي ومتاخدش ولا نفس سيجارة واحد بعدها.. متقولش هاخد نفس واحد لان غالبا هترجع تاني

خلي عندك عزيمة قوية .. فكر في فوائد الإقلاع عن التدخين وفكر في أضراره .. اشغل الوقت اللي عادة بتذخن فيه بأي حاجة مفيدة .. و شوف حاجة تانية تواجه بها الضغط النفسي في الشغل او البيت او الحياة عموما

بلغ الناس القريبة منك انك هتبطل وفهمهم انهم لازم يشجعوك كل يوم ويساعدوك ويستحملوا عصبيتك اللي ممكن تزيد اول كم يوم بعد ما تبطل

لو في أكتر من واحد بيدخن في نفس البيت . يبقى مهم ان كله يبطل في نفس الوقت عشان لو واحد بس بطل هيرجع يدخن تاني بسهولة

يعتبر العلاج النفسي لوحده مش كفاية خصوصا لما تبدأ تظهر عليك اثار انسحاب النيكوتين من جسمك وتبقى ملهوف على سيجارة ولما ترجع تدخن تلاقي الاثار الوحشة دي راحت فتفتكر ان التدخين حلو وصحتك اتحسنت عليه !! ودا مش صحيح انت بس محتاج تعالج الاعراض دي

أدوية الإقلاع عن التدخين ٣ أنواع وكلهم مفيدين جدا ومينفعش تاخد نوعين مع بعض عشان ميحصلش مضاعفات .. اول نوعين دول ممنوع بعض الناس تاخدهم ولازم لازم تسأل طبيب بشري او طبيب صيدلي قبل ما تاخدهم

 Champix 

 بتحدد يوم هتبطل تدخين فيه وبعدين تبدأ تاخد العلاج ١٤ يوم قبل اليوم البي هتبطل فيه .. هو موجود في السوق بتركيزين نص مجم وواحد مجم .. الجرعه: 

1- اول ثلاث ايام بتاخد 0.5 مجم مرة في اليوم

2- من اليوم الرابع الي السابع 0.5 مجم مرتين في اليوم

3- من اليوم الثامن الي توقف العلاج 1 مجم مرتين في اليوم 

الكورس العلاجي لمدة ثلاث شهور

 Zyban

 نفس الكلام بتبدأ العلاج قبل اليوم اللي هتطبل فيه ب ١٤ يوم

الجرعه:

1- قرص واحد يوميا لمدة 6 ايام( الجرعه الاولي)

2-  قرص مرتين يوميا لمدة 7 أسابيع (الجرعه الثانيه)